ಶುಕ್ರವಾರ, ಮಾರ್ಚ್ 22, 2013

ಸುಮಧುರ ಭಾವನೆಯು

ಮುಸ್ಸಂಜೆಯ ಮಧು ಸಿಂಚನ
ನಿನ್ನದರದ ಆ ಕಂಪನ
ಸುಮಧುರ ಭಾವನೆಯು
ಸಮ್ಮೋಹನ ನಿನ್ನ ನಡೆಯು
 
ನಿನ್ನೀ ಸೊಬಗಿನ ಒನಪು ಒಯ್ಯಾರಕೆ
ತುಟಿಗಳೇ ನಾಚುತಿವೆ
ನಿನ್ನೀ ತನುವ ಪರಿಮಳಕೆ
ನಾನೆಲ್ಲೋ ತೇಲುತಿಹೆ

ನಿನ್ನೀ ಕಾಲ್ಗೆಜ್ಜೆ ದನಿಯೊಳಗೆ
ಎದೆಬಡಿತ ಬೆರೆಯಲು
ಕೈಯ ಬಳೆಯ ನಾದಕೆ
ಹೃದಯವೇ ಜಾರಿಹಿದು

ಪ್ರೀತಿಯ ಮೊದಲ ಮಳೆಯ ಕಂಪು
ನನ್ನೆದೆಯಲಿ ತಂಪ ಬಳಿಸಿ
ನಿನ್ನ ಸ್ಪರ್ಶಿಸುವ ಆ ಗಾಳಿ
ನನ್ನ ಉಸಿರ ಬೆಸೆಯಿತು


ನಿನ್ನುಸಿರಲೇ ಕಲೆತಿಹೆನು
ಮೈಮರೆತು ಹೋಗಿಹೆನು
ಹಸಿದ ಕನಸಿಗೆ ಜೀವ ತುಂಬಿ
ಹೊಸತನ ರಸದ ಗಳಿಗೆ

ನನ್ನೀ ಎದೆಯ ವೀಣೆಯ ಮೀಟಿ
ನಡುವಲ್ಲಿ ಚೈತನ್ಯ ನರ್ತಿಸಲು
ಪ್ರೇಮ ರಾಗವ ಹರಿಸಿಹೆ
ಮೃದುಲ ಆಲಿ೦ಗನದ ಬಿಗಿ ಬ೦ಧನ

ಪ್ರಣಯ ಸುಖದಿ ತ೦ಪುಸೋನೆ
ಒಡಲಲ್ಲಿ ಸವಿ ಭಾವ ತರ೦ಗ
ಎದೆಯಲಿ ಮೃದು ಕ೦ಪನ
ಸಪ್ತ ಸ್ವರದ ಹೃದಯ೦ಗಮ

ನೀ ಕಡಲು ನಾ ತೀರ
ನನ್ನದೆಯನೆ ಸವೆಸಿಬಿಡು
ಆಸೆಯು ಸಾಗರವು
ನಿನ್ನಪ್ಪುಗೆ ಅಲೆಯಲದು ಸಾಕಾರವು


ಪ್ರೀತಿ ತಂದ ಈ ಸಿಹಿ ನೋವಿನಲಿ
ಬದುಕಾಗಿದೆ ಹೂವ ಹಂದರ
ಜಗವು ಸುಂದರ ನಿನ್ನೊಲಿವಿನಲಿ
ಅರಿಯದಾದೆ ನಿನ್ನೊಳಗೆ ನಾನು

ನಿನ್ನ ಸ್ಪರ್ಶ ತಂದ ಸೊಂಪು
ನನ್ನುಸಿರ ಆವರಣದಿ ಬೆಚ್ಚನೆ ಮುತ್ತನಿಟ್ಟು
ನಿನ್ನ ಪಕಳೆಯೊಳಗೆ ಬ೦ಧಿಯಾಗಿ
ನನ್ನ ನಾ ಧಾರೆ ಎರೆದೆ
ರಾ....

2 ಕಾಮೆಂಟ್‌ಗಳು: